Түүх, соёлын үл хөдлөх дурсгал
ДӨ-ОХСДГ дахь түүх, соёлын үл хөдлөх дурсгалууд
ДӨ-ОХСДГ нь хүн төрөлхтний түүх, соёлын бүхий л үеийг гэрчлэх археологийн дурсгалууд хадгалагдан үлдсэн өлгий нутаг бөгөөд наанадаж 58000,0 - 62000,0 жилийн өмнөх үеийн дунд палеолитоос эхлэлтэй түүх, археологийн бүхий л үеийн дурсгалууд оршдог.
- Чулуун зэвсгийн дурсгалт газар
- Хаднаах зураг бичгийн дурсгал
- Булш, хиргисүүр, тахилын байгууламж
- Эртний хотын туурь, архитектур, сүм хийдийн дурсгал
- Хөшөө дурсгал
- Тахилгат газар нутаг
Чулуун зэвсгийн дурсгалт газар
Түүхэн тодорхой цаг үед хүмүүсийн аж төрж байсныг гэрчлэх чулуун зэвсэг, түүнийг хийхэд үлдсэн чулууны үлдэгдэл, хоол хүнсний үлдэгдэл болон бусад хүмүүсийн хэрэглэж байсан эд зүйлсийн ул мөр бүхий олдвортой (соёлт давхарга бүхий) дурсгалт газрыг хамруулна.
Хаднаах зураг бичгийн дурсгал
Байгалийн тогтцоороо байгаа хад чулууны толигор гадаргуу дээр хүн, мал, амьтан болон бусад зүйлсийн зургийг тусгай багаж зэвсэг ашиглан сийлсэн, зос болон бэх, шороон будгаар зурсан бүх төрлийн хадны зургууд хамаарна.
Булш, хиргисүүр, тахилын байгууламж
Түүхэн тодорхой цаг үед хүмүүс талийгаачдаа тусгай зан үйлийн дагуу оршуулж мод, чулуу, шороогоор дарсан булш, оршуулга, хиргисүүрүүд, тахилын байгууламжууд, түүний бүрдэл хэсгүүд болох хашлага, зэл (балбал) чулуу зэрэг хамаарна.
Эртний хотын туурь, архитектур, сүм хийдийн дурсгал
Түүхэн тодорхой цаг үед хүмүүс урт хугацаагаар суурьшиж байсан үйл ажиллагааг харуулсан болон, цэргийн бэхлэлт болгон барьж байгуулсан барилга байшин, хэрмийн үлдэгдэл хамаарна.
Хөшөө дурсгал
Түүхэн тодорхой цаг үед зан үйл, шүтлэг бишрэл, түүхэн тэмдэглэлт үйл явдалд зориулан босгосон түүх, урлагийн үнэ цэнэ бүхий бүх төрлийн хөшөө дурсгал хамаарна.